Sékda Déwa Indra Nunasang TPID Sayaga Angka Inflasi Nincap Nampek Rahinan Jagat
- 16 Februari 2024
- 15:02 WITA
- News
TABANAN, Balitopnews.com - Sekretaris Daérah Provinsi Bali Déwa Madé Indra mapinunas ring Tim Pengendali Inflasi Daérah (TPID) Provinsi Bali lan Kabupatén/Kota sayaga angka inflasi nincap nampek rahinan jagat Galungan, Kuningan, Nyepi, lan bulan ramadhan. Indiké punika kabaosang ri kala mungkah Rapat Koordinasi TPID lan Penyusunan One Page Summary mapakitan TPID Award 2024 ring Ballroom HOMM Saranam, Baturiti, Tabanan, Sukra Pon Julungwangi, 16 Fébruari 2024.
Sékda Déwa Indra maosang, nampek rahinan jaga biasané kasarengin antuk nincapnyané bebuatan kramané. “Panguntat Fébruari wénten Galungan, ngawitin Maret wénten Kuningan lan Nyepi. Nglantur bulan Ramadhan,” baos Déwa Indra. Nika mawinan pemerintah mautsaha nyiagayang sané kabuatang olih kramané mangdané nénten wénten inflasi.
Déwa Indra precaya TPID prasida ngutsahayang sané kabuatang olih kramané. Déwa Indra ngwewehin, Bali sampun sesai ngarepang aab jagat sané ngawinang memicu inflasi. “Pemerintah sida ngendukang angka inflasi apang pangarga barang nénten nincapang,” baos Déwa Indra. Pejabat sané embas ring Singaraja puniki ngajakin angga TPID nglaksanayang pengawasan intensif ring kawéntenan daging lan pangan. Déwa Indra taler urati ring pangarga beras sané nincap. “Mangdané pangargan beras nénten terus nincapang, pemerintah sampun ngrembug sareng Bulog,” baos Déwa Indra.
Sékda Déwa Indra ngélingang TPID ngmargiang prinsip 4K luiré Keterjangkauan Harga, Ketersediaan Pasokan, Kelancaran Distribusi, lan Komunikasi Efektif.
Kepala Perwakilan BI Provinsi Bali R. Érwin Soeriadimadja muji angga TPID sajebag Bali sampun sida ngendukang angka inflasi kantor 2,6 persen. Dané taler nyumbungang jagat Bali pinaka daerah tujuan pariwisata. Rakor TPID ngrauhin Guru Besar Fakultas Pertanian Univérsitas Lampung Prof Dr Ir Bustanul Arifin, M. Sc lan Analis Kebijakan Ahli Muda Kemenko Perekonomian RI Sri Purwanti. Prof. Bustanul micayang utsaha-utsaha nyaga kawéntenan suplai bahan kebutuhan pokok. (Rls/Btnc)
Komentar