Pj. Gubernur Bali Gargita Nyanggra Pangrencana Pembangunan Gasing Center ring Bali
- 19 Februari 2024
- 11:02 WITA
- News
DÉNPASAR, Balitopnews.com - Penjabat (Pj) Gubernur Bali Sang Madé Mahéndra Jaya garjita nyanggra pangrencana pembangunan Gasing Center ring Bali, kriya mitra pemerintah daérah lan Pertamina. Indiké puniki kabosang ri kala nerima audiensi utawi pangrauh ahli Fisika dan Matematika, Prof. Yohanes Surya, ring Ruang Tamu Gubernur Bali, Kantor Gubernur Bali, Dénpasar, Soma Umanis Sungsang (19 Fébruari 2024).
Manut Mahéndra Jaya, wénten 2 (kalih) kabupatén sané nglaksanayang mitra kanti sareng Pertamina nglaksanayang pelatihan Gasing sané kabiayain olih Lembaga Pengelola Dana Pendidikan (LPDP). Kalih kabupatén puniki inggih punika Kabupatén Gianyar lan Kabupatén Badung. Prof. Yohanes Surya kasarengin semeton ngungingang paplajahan Gasing (Gampang, Asyik, lan Menyenangkan) wantah prosés sané kasusun mangda nguasaang paplajahan utawi penguasaan materi.
“Prosés ring metodé Gasing kacingakin ri kala alit-alité malajahin topik, wénten titik kritis sané patut kaliwatin, ri sampuné neked ring titik kritis puniki, ipun ten kéweh malih ngaryanang soal ring topik punika. Métode puniki kaanggén sambilang ngédéngang video pembelajaran ring Manokwari Selatan, Papua Barat,” baos Prof. Yohanes. Dané nguningang, pamargin métode Gasing ngawinang papinhé liang mlajahin Matematika.
Dané ngwewehin, métode Gasing karipta anggén ngilangang rasa jejeh mlajahin Matematika sané kasengguh serem olih para murid ring Indonésia. Ketékan, ngapalang rumus, kantos ningalin angka-angka ngawinang akéh muridé ngekoh mlajahin paplajahan Matematika puniki.
Kala punika, Pj. Gubernur Bali Mahéndra Jaya kadampingin Kepala Bappeda I Wayan Wiasthana Ika Putra, Kepala Dinas Pendidikan, Pemuda dan Olahraga Provinsi Bali Ketut Ngurah Boy Jayawibawa, lan Asisten Perekonomian dan Pembangunan Setda Provinsi Bali I Wayan Sarinah nekedang meled malih ngidupang SMA lan SMK Bali Mandara. “Titiang ngrencanayang malih nglanturang pola pendidikan SMA lan SMK Bali Mandara. Pinaka sinalih tunggil utsaha muputang kemiskinan lan kebodohan malarapan pendidikan katur ring alit-alité. Sakadi sami sampun nguningin, ri kala SMA lan SMK Bali Mandara kamargiang sida ngembasang lulusan sané luar biasa. Maduwé préstasi lan bersaing nénten ja ring dalam negeri, nanging kantos ngranjing ring perguruan luar negeri, yadiastun alit-alité puniki saking keluarga miskin,” baos Mahéndra Jaya.
Dané ngwewehin, pisarat katerima ring SMA/SMK Bali Mandara wantah murid saking keluarga miskin. “Iraga nénten uning, yadiastun ipun saking keluarga miskin sakémaon ipun ngelah rasa jengah mangda maju tur nincapang keluarga. Nika mawinan nénten éran yéning ipun lulusan SMA/SMK Bali Mandara maduwé kemampuan akademis sané tan sandang raguang malih. Akéh sampun dados calon dokter, calon perwira ring Akademi Kepolisian lan makudang univérsitas unggulan dalam negeri tur luar negeri,” teges Mahéndra Jaya. Sareng sami ngromba pendidikan semi militer lan kedisiplinan sané tinggi, pastika sida ngwangun malih SMA/SMK Bali Mandara. (Rls/Btnc)
Komentar