Bali Tuan Rumah Kongrés APAO ke-39 Sékda Dewa Indra Ngajakin Para Atiti Maplesiran ring Bali
- 22 Februari 2024
- 20:02 WITA
- News
BADUNG, Balitopnews.com – Taksu Pulo Bali ngawinang Bali dados tuan rumah mahasabha utawi Kongrés Dokter Mata sajebag Asia Pacific utawi The 39th Asia Pacific Academy of Ophthalmology (APAO) Congréss sané kalaksanayang ring tanggal 22-25 Fébruari 2024. Sekretaris Daérah Provinsi Bali Déwa Madé Indra ngulemin para atiti délegasi kongrés inggih punika dokter saking negara anga Asia Pacific maplesriran ring Bali, nyingagin sakamata, seni, budaya, ajeng-ajengan lan produk UMKM Bali. Uleman punika kasobyahang ri kala Sékda Déwa Indra mungkah acara The 39th Asia Pacific Academy of Ophthalmology (APAO) Congréss ring BNDCC-Nusa Dua, Wraspati Wagé Sungsang (22 Fébruari 2024).
Déwa Indra ngaptiang mahasabha utawi kongrés mapikolih tur embas inovasi anyar sané prasida kamargiang ring ilmu oftalmologi kapungkur wekas. “Titiang precaya taksu lan greget Bali prasida nuldulin tur mapica sané becik ring panglimbak ilmu oftalmologi kapungkur wekas. Titiang ngaptiang para atiti délegasi prasida nyelahang galang maplesiran ka genah wisata, ajeng-ajengan lokal, budaya, lan nonton balih-balihan apang wénten inget-ingetan malancaran ka Bali,” teges Déwa Indra.
Menteri Keséhatan RI Budi Gunadi Sadikin negesang, Indonésia pamekasné Bali marasa gargija kapercayain dados tuan rumah Kongrés APAO. Kongrés puniki kaaptiang mapicaya kontribusi becik majeng panglimbak ilmu pengetahuan oftalmologi ring Indonésia napimalih Indonésia sedeng nglimbakang tetamban nétra utamannyané ring daérah-daérah terpencil. Nika mawinan Puskesmas ring désa-désa kaaptiang maduwé teknologi anggén nguningin utawi pendeteksian makudang-kudang penyakit, utamanyané mata.
Manggala Kongrés APAO 2024 Muhamad Sidik maosang, Kongrés Akademi Oftalmologi Asia-Pasifik (APAO) ke-39 kalaksanayang sinarengan PERDAMI ke-49 utawi Pertemuan Tahunan Perhimpunan Dokter Spesialis Mata Indonesia (IOA) ring Bali kasarengin antuk 80 negara saking Asia Pasifik. “Titiang marasa garjita riantukan Bali malih kadadosang tuan rumah (naenin ring warsa 2009) kongrés APAO, mangkin sampun dados acara profesional lan ilmiah oftalmik terkemuka. Warsané mangkin maduwé téma Beyond All Limits – tatujonné nyiapang praktisi oftalmik kapungkur wekas riantukan perawatan mata ngancan nglimbakang,” baos Muhamad Sidik.
Kongrés APAO 2024 wantah sinalih tunggil mahasabha pinih becik tur nglangenin riantukan prasida nglimbakang kaweruhan utawi wawasan ilmiah lan ngiket mitra kanti sareng negara tiosan. Kongrés puniki pacang nincapang kawagedan ring spéktrum oftalmologi.
Présiden Akademi Oftalmologi Asia-Pasifik Prof Ava Hosain maosang, Kongrés APAO 2024 ring Bali nemuang para dokter mata saking makudang-kudang panegara tur ngrauhin sawatara 800 pamaos sané sampun kasumbung ding jagad internasional micayang pakaryan anyar lan inovasi ilmiah ring subspesialisasi utama mata. Katarka sawatara 5.000 atiti utawi délegasi sampun nguningang pacang ngrauhin kongrés.
Lianan molihang pengetahuan lan keterampilan anyar, kongrés tahunan puniki taler micayang galah utawi kesempatan becik majeng para atiti délegasi ngwangun mitra kanti utawi jaringan lan masekaa sareng suwitra. Para atiti taler ngamolihang nonton balih-balihan, lelintihan Bali, ajeng-ajengan sané jaen tur kauripan wenginé ring Bali. Kongrén karauhin olih Menteri Keséhatan RI, Kepala Dinas Keséhatan Provinsi Bali lan atiti lianan. (Rls/Btnc)
Komentar