Pj. Gubernur Bali Lantik 4 Pejabat Pimpinan Tinggi Pratama
- 22 Februari 2024
- 12:02 WITA
- News
DÉNPASAR, Balitopnews.com - Pj. Gubernur Bali S.M Mahéndra Jaya ngaturang rahajeng majeng petang (4) diri pejabat pimpinan tinggi pratama wewidangan Pemerintah Provinsi Bali sané kalantik. “Matur suksma majeng pejabat sané sampun purna tugas ri antukan sampun mapica ayah-ayah becik ring krama. Maka sami sampun makarya becik tur mapica préstasi. Salanturnyané majeng pejabat sané kasudi ngentosin, titiang ngaptiang nglanturang swadharma,” baos Mahéndra Jaya ri kala ngambil sumpah janji jabatan Pejabat Pimpinan Tinggi Pratama wewidangan Pemerintah Provinsi Bali warsa 2024 ring Gedung Kertha Sabha, Dénpasar, Wraspati Wagé Sungsang (22 Fébruari 2024).
Pj Gubernur Bali nunasang, program sané sampun mamargi becik mangda katincapang malih mangda sayan-sayan becik. Pakaryan sané kantun kirang mangda kabecikang mangda prasida mapica pelayanan becik majeng krama. Petang (4) diri Pejabat Pimpinan Tinggi Pratama wewidangan Pemerintah Provinsi Bali sané kalantik inggih punika I Wayan Sumarajaya sadurungnyané dados Widyaiswara Ahli Madya UPTD Pengembangan Kompetensi Sumber Daya Manusia, BKPSDM Provinsi Bali, mangkin dados Kepala Dinas Penanaman Modal dan Pelayanan Terpadu Satu Pintu Provinsi Bali.
I Gusti Ngurah Putra Dharma Jaya yang sadurungné dados Wakil Direktur Administrasi dan Sumber Daya Pada Rumah Sakit Umum Daérah Bali Mandara Provinsi Bali mangkin dados Direktur RSUD Bali Mandara Provinsi Bali. Ni Madé Suryanadi sadurungne dados Dokter Ahli Madya ring Rumah Sakit Mata Bali Mandara dados Direktur Rumah Sakit Mata Bali Mandara Provinsi Bali. Ni Wayan Murdani sadurungné Kepala Bidang Sumber Daya Keséhatan Dinas Kesehatan Provinsi Bali mangkin dados Direktur Rumah Sakit Jiwa Provinsi Bali.
Pj. Gubernur Bali ngwewehin antuk pejabat sané ‘berkualifikasi’, maduwé rekam jejak tur makarya becik pastika prasida ngembasang pengabdian becik majeng krama. “Antuk punika, soang-soang unit kerja mangda becik, genah makarya resik, ajér, transparan, solidaritas, tur ten wénten parilaksana nyapa kadi aku. Pinih mabuat tetep malaksana nginutin undang-undangan lan SOP,” baos Mahéndra Jaya. Pj Gubernur Bali negesang, becik kaon pakaryan ring unit kerja pastika nglalahin ring organisasi lianan. Antuk punika, dané nunasang majeng ring makasami pegawai mangda guyub makarya mangda embas rasa gotong royong, sagilik-saguluk salunglung sabayantaka, paras-paros sarpanaya, saling asah, asih, asuh. (Rls/Btnc)
Komentar