Balitopnews.com, Denpasar 

Gubernur Bali, Wayan Koster malih mawali ngamargiang sosialisasi mapaiketan ring visi Nangun Sat Kerthi Loka Bali majeng ring krama Bali. Ri tepengan mangkin acara sosialisasi kamargiang marupa kuliah umum sane kalaksanayang ring ajeng civitas akademika Universitas Hindu Indonesia (UNHI) magenah ring Kampus UNHI, Penatih, Denpasar, dina Sukra (12 April 2019). Ring sajeroning acara kuliah umum punika, Gubernur Koster maosang UNHI madruwe kepakaran ring widang ilmu-ilmu sane khusus, sane prasida ngicenin kontribusi/sumbangsih ngawantu ngawerdiang visi Nangun Sat Kerthi Loka Bali. 

 

Ring acara kuliah umum punika Gubernur Koster maosang sajeroning program-program pembangunan Bali limang warsa sane jagi rauh, wenten makudang program sane mapaiketan ring kawentenan UNHI mangda sareng mautsaha ring sajeroning paridabdab ngamargiang Tri Dharma Perguruan Tinggi pamekasnyane pawangunan ring widang adat, agama, seni, miwah budaya. 

 

Mantan anggota DPRD RI puniki maosang UNHI madruwe karakter sane matiosan/mandiri, punika makahawinan patut kasarengin ritatkala ngarincikang pangrencana pamargin kebijakan anggen ngawerdiang Bali kapungkur wekas. "Manut ring institusionalnyane sampun janten duaning iriki wenten wangun kawagedan utawi kapascadan ring widang-widang sane khusus," kadi asapunika baos Ketua DPD PDI Perjuangan Provinsi Bali puniki. 

 

Rektor UNHI Prof. Dr. drh. I Made Damriyasa, maosang ring sajeroning visi Nangun Sat Kerthi Loka Bali pinaka visi pembangunan limang warsa sane jagi rauh akehan madaging program-program sane nukung utsaha ngukuhang adat, agama, seni, miwah budaya sane dados widang unggul ring UNHI. Indike punika makahawinan, kuliah umum rahina sane mangkin ngunggahang tema 'Sareng UNHI Ngiring Mautsaha Nangiang Sat Kerthi Loka Bali,' kadi punika dane ngawewehin. 

Koordinator Kelompok Ahli Pemerintah Provinsi Bali puniki maosang tambis-tambis makasami rarincikang pembangunan sane karencanayang olih Gubernur Bali limang warsa sane jagi rauh puniki inggih punika sapunapi iraga mangda prasida ngalestariang budaya Bali, nyemit alam/palemahan Bali, tur ngawerdiang kasukertan krama Bali. "Makasami program studi titiang ring UNHI wantah program studi sane nginggilang sapunapi carane mangda budaya Hindu Bali prasida ngaranjing tur nyusup ring makasami program studi sane wenten ring UNHI." Kadi asapunika kategesin olih Damriyasa. 

 

Ring galah punika taler Gubernur Bali Wayan Koster taler nyelagin galah dane macecingak ring Gria Sehat Ayurweda. Gria Sehat puniki wantah fasilitas/sarana matetamban sane ngabungang Usada Bali sareng Ayurweda. Yadiastun durung memargi, gedung matingkat tiga puniki sampun siaga antuk fasilitas/sarana miwah SDM tenaga pengobatan tradisional miwah terapis. "Proses izinnyane kantun kapuputang," baos Rektor UNHI.    (Balitopnews.com / Amo Bali )