Balitopnews.com, Badung 

Gubernur Bali Wayan Koster nguningayang yening Bali miwah pariwisatannyane mangda tetep ajeg nyantos kawekas, patut satata eling ring kasukseman miwah ngemit Bali pinaka 'Island of God'. "Napi sane makahawinan para wisatawan rauh ke Bali saking riin? Sane makahawinan  wantah budaya, peradaban, seni, adat miwah kearifan lokalnyane sane makahawanin kawastanin 'Island of God'. Taksu niskala sane ngawinang iraga matiosan sareng daerah lianan. Punika sane patut kakemit mangda iraga satata survive," kadi asapunika baos dane Gubernur Koster. 

 

Ring sajeroning acara sane mamurda 'Walk The Talk with Guvernor of Bali : Sinergy and Harmony Under Nangun Sat Kerthi Loka Bali' sane kalaksanayang ring Harris Hotel, Sunset Road Kuta, rahina Wrehaspati, 11 April 2019 wengi. "Taksu (aura) Bali sane mangkin sayan nguredang, punika taler kearifan lokal, wawidangan palemahannyane, miwah jadmannyane. Yening banggeang indike sapunika, Bali nenten malih katuju tur naut kahyun para wisatawan. Duaning asapunika, patut kadabdabin makasami, katitenin becik-becik," kadi punika baos dane. 

 

Mapaiketan ring punika, ring arepan panyiuan pelaku pariwisata Bali, Koster nyobyahang mabuat pisan nguningayang visi Nangun Sat Kerthi Loka Bali napimalih widang pariwisata sane dados silih sinunggil sektor prioritas. "Kapungkur wekas pariwisata Bali pacang terus kawangun tur kabecikin. Para pelaku pariwisata mangda terus kaicenin informasi miwah komunikasi ngeninin indik regulasi, program, perda, pergub mangda mamargi manut sakadi pangaptin iraga sareng sami," kadi asapunika teges dane Wayan Koster. 

 

Gubernur saking Sembiran, Buleleng puniki taler nyobyahang pelaku pariwisata wantah pilar sane mabuat pisan ring sajeroning pamargin makudang-kudang program ngeninin indik kepariwisataan." Ida Dane makasami wantah pelaku utama ring lapangan, sane ngamargiang, sane langsung namtamin kebijakan sane kamargiang," kadi asapunika teges dane. 

 

Koster taler maosang, pelaku pariwisata taler madue peran sane ageng majeng ring Bali mangda prasida ngamolihang hasil sane becik (maksimal) saking kemajuan pariwisata. "Kapungkur, sajabaning nyangga tur nukung pertumbuhannyane, pariwisata taler mangda tetep kadasarin antuk budaya miwah sida kawerdiang ring asiki tata kelola sane becik," baos Ketua DPD PDI Perjuangan Bali puniki. "Kawewehin malih alokasi anggen promosi sane jagi katincapang mangda sayan ngamecikang," kadi asapunika dane ngawewehin. 

 

Becik kaonnyane pariwisata Bali manut Koster, pacang mapuara taler ring sektor ekonomi Bali miwah sektor sane tiosan. "Silih sinunggilnyane sakadi ring sektor pertanian miwah industri, makasami mangda sinergis tur saling mendukung, nenten mamargi niri-niri," kadi asapunika baos dane. 

 

Duaning asapunika, Mantan Anggota DPR RI puniki negesang, Pemda pinaka pamucuk sane ngamedalang regulasi madue komitmen anggen ngaryanin kebijakan-kebijakan ring utsaha ngawerdiang pariwisata, taler regulasi tegas majeng ring sapa sira ugi sane mamurug. "Iraga sampun ngamuktiang rikala iraga nibakang danda majeng ring perusahan-perusahan ilegal sane beroperasi ring Bali, sane ngawinang pariwisata nenten becik," teges dane Koster. 

 

Sajabaning punika, Gubernur Koster taler nelatarang makudang-kudang fasilitas tambahan sane jagi kawangun sakadi convention center, gedung kesenian sane ageng, rauh ring museum tematik. "Miwah sane pastika sakadi infrastruktur pendukung, minakadi margi short cut miwah jalur kereta api," kadi asapunika dane ngawewehin. 

 

Ring acara sane pateh Wagub Tjokorda Oka Artha Ardana Sukawati (Cok Ace) madruwe pikahyun sane pateh sareng Gubernur, periode mangkin wantah galah sane becik majeng ring pemprov Bali anggen ngamuktiang visi miwah misi sane sampun kasobyahang, silih sinunggil anggen ngukuhang tur ngawerdiang pariwisata. "Imba sane tiosan, peraturan ngeninin indik sampah/mis plastik, desa adat miwah sane tiosan. Pelaku pariwisata patut uning napi kemanten sane sampun tur kantun kamargiang," baos Ida Tjokorda. 

 

Tios ring punika, manggala prawartaka Gusti Agung Ngurah Surya Wijaya maosang, tatujon sane pinih mabuat ring acara sane ngarauhang uleman langkung ring 1500 (siu limang atus) pamilet punika anggen pinaka momentum sinergitas pemda sareng stakeholder pariwisata. Pemda wantah pilar sane mabuat ring sajeroning pamargin panglimbak pariwisata, acara puniki taler pinaka media evaluasi majeng ring iraga sareng sami, ring genah miwah kahanan Pulo Bali pinaka destinasi pariwisata," kadi punika tegesnyane. (Balitopnews.com / Amo Bali )