Balitopnews.com, Denpasar. 

Gubernur Koster nyihnayang rasa angayu bagiannyane duaning Federation Cynologique Internationale (FCI) organisasi internasional sane mautsaha ngemit miwah ngawerdiang makasami trah miwah galur murni asu sane wenten ring jagate, sampun resmi nyungkemin asu Kintamani Bali wantah silih sinunggil trah sane khusus pinaka asu asli Indonesia. 

 

Napimalih pengakuan puniki wantah sane kapertama majeng ring asu asli Indonesia. "Pinaka jadma Bali titiang marasa bagia antuk apresiasi tur penghargaan sane tampi iraga sareng sami saking dunia internasional puniki," baos Gubernur Koster majeng ring para wartawan ring Denpasar, Saniscara (13 April 2019). 

"Puniki pinaka cihna dunia internasional sampun nyungkemin Bali madruwe asu trah asli antuk kualitas sane becik tur patut kasarengin ngamiletin pacentokan-pacetokan sane utama ring tingkat nasional miwah internasional," kadi asapunika dane negesang. 

 

Gubernur Koster, mapikeling inggian panyungkem puniki anggen pinaka jalaran numbuhang rasa jengah saking makasami krama Bali mangda sayan nincapang utsaha ngalestariang miwah ngawerdiang sarwa sato miwah sarwa tumuwuh lokal sane werdi ring jagat Bali. "Kawentenan palemahan/alam iraga dahat ngagawokin pisan, iraga akeh madruwe soroh buron sane asli tur mautama, sakadi jalak Bali, sapi Bali. Buron-buron punika patut lestariang anggen ngemit keunikan ekosistem alami Bali miwah prasida nincapang keunggulan kompetitif majeng ring sektor ekonomi lokal," baos dane Wayan Koster. 

 

Gubernur Koster ngaturang apresiasi tur suksmaning manah majeng ring IKK miwah makasami sang sane oneng ring asu Kintamani Bali sane sampun makudang-kudang warsa mayasa kerti tur mautsaha mangda trah asu asli Bali puniki polih pengakuan internasional. 

 

Surat pengakuan punika kasukserahang majeng ring Gubernur Koster olih Benny Kwok Wie Sioe pinaka manggala/ketua umum Indonesia Kennel Klub (IKK) ring acara konfrensi pers magenah ring Gedung Wiswasabha Utama kantor Gubernur Bali, Saniscara (13 April 2019). 

 

Benny Kwok Wie Sioe maosang, asu Kintamani Bali wantah asu trah asli Indonesia kapertama sane polih pengakuan/panyungkem dunia. "Pengakuan puniki maka cihna FCI sampun resmi nyobyahang ke sajebag jagat indik asu Kintamani Bali kasengguh siki trah asu sane khusus miwah asu Kintamani Bali inggih punika asu asli Indonesia," baosnyane. 

 

IKK sane dumun mawasta Perkin (Perkumpulan Kinologi Indonesia), wantah asiki kemanten organisasi sane khusus ngupapira lan nyayangin asu ring Indonesia sane wenang ngamedalang dokumen resmi saparindikan palekadan miwah riwayat asu. 

 

Kabaos, nyantos mangkin IKK sampun maderbe 60.000 (nem dasa tali) anggota sawawengkon Indonesia. Para anggota punika ngamargiang kennel-fasilitas pemuliabiakan, pelatihan miwah perawatan asu sane resmi miwah terdaftar. 

 

Pengakuan resmi saking FCI punika kasurat ring sajeroning dokumen (rarepi) sane kakirim olih Direktur Eksekutif FCI Yves De Clercq majeng ring IKK. "Komite Umum FCI duk 20 Februari 2019 sampun resmi/sah nyungkemin mangda ngicenin pengakuan majeng ring trah asu Kintamani Bali. "Titiang sareng sami ngaturang pangayu bagia miwah rahajeng majeng ring IKK antuk pikolih sane mabuat puniki," baos De Clercq. 

 

Malarapan antuk wentennyane pengakuan punika, asu Kintamani Bali wenang ngamiletin makudang-kudang pacentokan miwah show/pameran asu sane khusus ring tingkat internasional. Sajabaning punika, dokumen palekadan miwah silsilah/riwayat soang-soang asu Kintamani Bali taler wenang polih cap antuk logo FCI. 

 

Benny Kwok maosang indik proses mangda prasida polih pengakuan saking FCI mulan sayuwakti ngamerluang galah sane sue. FCI sampun kaloktah pinaka organisasi sane dahat ketat. "Yening saihang ring kawentenan politik internasional, FCI punika pateh linggihipun ring PBB (Perserikatan Bangsa-Bangsa)," kadi punika baos dane. 

 

Sadurung usulan pengakuan kahaturang majeng ring Komite Umum FCI, usulan punika katureksanin miwah kauji/kapintonin dumun olih kalih komite sane matiosan, inggih punika: Komite Standarisasi miwah Komite Ilmiah. Yening nenten polih panyungkem saking makakalih komite punika, usulan nenten pacang kabaosang olih Komite Umum FCI. "Risampune polih pengakuan resmi, FCI pacang satata nureksanin pakibeh asu Kintamani Bali salami 10 (dasa) tiban. Yening trah puniki nyinayang panglimbak sane becik, inggian ring widang akeh (jumlah) miwah kualitas ipun, makahawinan statusnyane pacang katincapang," baos dane. 

 

Kamedalang duk warsa 1911 olih lelima panegara sane ngembasang  (Jerman, Belgia, Perancis, Belanda, Austria), FCI mangkin sampun maderbe anggota 96 (sia dasa nem) panegara ring sajebag jagat tur maderbe kantor pusat magenah ring Belgia. (Balitopnews.com/Amo Bali).