Gubernur Koster Nyanggra Becik Pangrancana Penataan Wawidangan Pura Besakih
- 27 Mei 2019
- 14:04 WITA
- News
Balitopnews.com, Denpasar
Gubernur Bali Wayan Koster nyanggra becik pangrancana penataan wawidangan parkir ring Pura Besakih pinaka silih sinunggil bagian ring sajeroning konsep penataan sane ngingkupang makasami nyantos ring sawawengkon pura sane kawangun ring bongkol Gunung Agung, Kabupaten Karangasem punika.
"Penataan genah parkir sane pungkuran pacang kawewehin antuk fasilitas toilet miwah panyangkep sane tiosan punika, wantah penataan ring sajeroning widang 'palemahan'. Ring sajeroning visi Nangun Sat Kerthi Loka Bali, utsaha ngemit tur ngalestariang wawengkon suci Pura Besakih nenten wantah kakaryanin ring widang 'palemahan' kemanten, nanging kautsahayang taler rauh ring widang 'parahyangan' miwah 'pawongannyane', baos Gubernur Koster ring ajeng para pamilet parum mapaiketan ring pangrancana penataan Pura Besakih, magenah ring rumah jabatan Jaya Sabha, Denpasar, Radite (26 Mei 2019).
Paruman sane mamargi siang punika makanten sayan jangkep duaning sane rauh nenten wantah Gubernur miwah Wagub Bali Tjokorda Oka Artha Ardhana Sukawati (Cok Ace), nanging karauhin taler olih Dirut PT. Waskita Karya I Gusti Ngurah Putra, anggota DPRD Bali Nyoman Parta lan tim ahli Gubernur sane kawentuk anggen ngawantu ngaryanin konsep perlindungan kawasan suci Besakih.
Sadurung punika, saking PT. Waskita Karya ring ajeng Wagub Cok Ace awuku sane lintang, polih nelatarang indik pangrancana penataan wawidangan parkir ring wawengkon pura sane pinih ageng ring Bali punika. Buka aripe kapicayang galeng, Gubernur Koster langsung ngobyahang pikahyunan dane sane cumpu ring sajeroning pangrancana sane sampun marupa wentuk penataan wawidangan suci yening selehin saking widang 'palemahan' punika.
"Titiang ngatenang utsaha puniki kalintang becik, saking widang palemahannyane pinih riin patut resikin tur becikin dumun," baos Gubernur Koster sane taler kajudi pinaka Ketua DPD PDI Perjuangan Bali.
Sakadi sane sampun karincikang sadurungnnyane, ngeninin indik pangrancana penataan Pura Besakih, silih sinunggilnyane matetujon pinaka pamargi anggen ngutsahayang mangda nenten malih wenten kemacetan arus lalu lintas sane sering karasayang ring wawidangan pura sangkaning akehnyane arus kendaraan miwah pamedek nyabran wenten rahinan.
Antuk wentennyane pangrancana ngawangun gedung parkir kajangkepin antuk makudang fasilitas sane madruwe daya tampung langkung ring 3.000 (tigang tali) kendaraan roda empat miwah sawatara 1.500 (siu limang atus) roda dua, kaaptiang prasida dados pamargi anggen ngalintangin pikobet ngeninin indik kemacetan miwah kesemrautan arus lalu lintas ring wawidangan punika. Tios ring punika, pangrancana pawangunan gedung parkir puniki taler kasarengin antuk utsaha penataan alur kendaraan, mangda nenten malih wenten kendaraan sane saling mapapasan.
Nyoman Popo Danes, silih sinunggil anggota tim ahli Gubernur Tematik Besakih, maosang indik pangrancana puniki sampun ngaranjing ring pangrancana umum sajeroning konsep ngemit tur ngarajegang Pura Besakih.
Dane akeh ngatenang nyantos mangkin makweh pihak sane nembe tur madruwe pangrancana ngaturang ayah utawi punia majeng ring Pura Besakih, nanging durung ngeniang asiki konsep ageng sane pateh. Duaning kadi asapunika, manut dane, pangrancana puniki pacang dados bagian saking konsep nyaga utawi ngemit, sane kantun karincikang olih tim sane sampun kawentuk.
Dirut PT. Waskita Karya, I Gusti Ngurah Putra mapangapti, Popo Danes makamiwah timnyane mrasidang ngaryanin pangrancana penataan wawidangan Pura Besakih sane maderbe nuansa lokal utawi taksu Bali. "Yadiastun durung wenten panyumpuan sane pastika kaunggahang sajeroning ilikita masurat, tim PT. Waskita Karya miwah tim ahli Gubernur pacang digelis tedun ke lapangan tatujonnyane mangda sareng-sareng nasakin konsep utawi pangrancana punika," baos dane negesang. (Balitopnews.com/Amo Bali).
Komentar