Gubernur Koster Nyiagayang Regulasi Perlindungan Tenaga Kerja Lokal
- 28 Mei 2019
- 14:08 WITA
- News
Balitopnews.com, Denpasar
Gubernur Bali Wayan Koster malih nyihnayang rasa sumekennyane miwah rasa elingnyane ring utsaha ngemit miwah nincapang kualitas tenaga kerja lokal Bali. Saking riin sektor ketenagakerjaan wantah silih sinunggil prioritas ring sajeroning makudang-kudang program anggen nunjang visi 'Nangun Sat Kerthi Loka Bali' ngawangun Bali Era Baru.
Kadi asapunika kasobyahang rikala Gubernur Koster nyanggra audiensi perwakilan DPD Konfederasi Serikat Pekerja Seluruh Indonesia (K-SPSI) Provinsi Bali ring Kantor Gubernur Bali, Renon, Denpasar duk rahina Anggara (28 Mei 2019) semeng.
"Titiang ngutamayang upaya anggen ngawangun sistem, saking hulu nyantos ke teben, antuk upaya sane rata utawi menyeluruh miwah nenten parsial anggen ring sektor ketenagakerjaan puniki," baos Koster.
Program miwah kebijakan punika manut Gubernur Wayan Koster, kasurat ring sajeroning Peraturan Gubernur utawi Pergub sane sedeng karincikang. Pergub punika, salanturnyane pacang dados titi pangancan utawi sepat siku-siku ring sajeroning nepasin makudang-kudang upaya ring widang ketenagakerjaan, pamekasnyane anggen nukung miwah ngemit tenaga kerja lokal Bali.
"Makasami pacang katata miwah kabecikang malih, ngawit saking sistem rekrutmen, nincapang kompetensi lan daya saing miwah kemampuan manajerialnyane," baos Koster.
Ketua DPD PDI Perjuangan Bali puniki taler nyobyahang, kapungkur upaya ring sajeroning nincapang daya saing puniki patut becik-becik kauratiang mangda tenaga kerja lokal prasida masaing sareng tenaga kerja saking genah tios minakadi sane rauh saking dura Bali. "Kepascatan miwah kepradnyanan patut terus katincapang, patut wenten diklat (Pendidikan miwah Pelatihan, red) sane ngawangun kerjasama sareng perguruan tinggi anggen nincapang armada kerja sane satata siap siaga tur maderbe kompetensi," dane ngawewehin.
Koster taler nilikang indik jam kerja lan swadharma mangda nyarengin parikrama sajeroning adat istiadat sane kantun manggeh ring Bali. "Titiang sareng jajaran makasami pacang ngarincikang peta minimun kerja karyawan per awukunnyane sane seimbang utawi ideal. Dadosnyane yening wenten parikrama-parikrama adat prasida kaicen galah ring dina tiosan. Tur sangkaning upaya puniki mapuara nenten pacang ngirangin jam kerja miwah kinerja karyawan majeng ring perusahan," baos Koster.
Dane taler nerima masukan utawi makudang-kudang pangenjuh saking asosiasi miwah serikat pekerja anggen maripurnayang regulasi sane sedeng karincikang.
Tios ring punika, Ketua DPD K-SPSI Bali Made Madra maosang makudang-kudang masukan utawi pangenjuh mapaiketan ring widang tenaga kerja ring Bali. Silih sinunggilnyane pekerja kontrak miwah outsourcing mangda mrasidang polih pengakuan sane sayan becik. "Dumogi wenten kebijakan sane mrasidang nindihin parindikan punika," kadi punika pangaptinnyane.
Ring widang tiosan, Madra sane maderbe swagina ring widang pariwisata maosang pamujinnyane antuk makudang utsaha sane sampun kamedalang olih Pemprov Bali. Silih sinunggilnyane ngawatesin timbulan mis plastik sekali pakai, sane kabaos antuk dane dahat mabuat pisan majeng ring 'wajah' pariwisata Bali makasami. "Kebijakan punika, titiang tureksanin newek ring lapangan dahat mabuat pisan ring upaya nincapang kebersihan ring wawidangan-wawidangan wisata. Kahanan ring pasisi makanten sayan resik miwah sayan nyaman karasa olih wisatawan," baos dane nelatarang. (Balitopnews.com / Amo Bali)
Komentar