Gubernur Bali Mautsaha Ngamargiang Pasuwakan majeng ring Krama sane Keni Dampak Proyek Shortcut
- 07 Juni 2019
- 15:02 WITA
- News
Balitopnews.com, Buleleng
Galahe sane luang mapaiketan ring dina cuti sinarengan hari Lebaran, kawigunayang olih Gubernur Bali Wayan Koster mangda polih mratiaksanin tur lunga ke makudang-kudang genah sane dados titik proyek pembangunan margi shortcut sane nyambungang Mengwitani, Kabupaten Badung sareng Kota Singaraja, Bali sisi kaja, rahina Sukra (7 Juni 2019).
Saking 12 genah titik pembangunan sane karincikang mangda dados margi 'pemendek jarak' punika, papat genah pamekasnyane salami siang punika katureksanin olih Gubernur Koster kasarengin antuk rombongan.
Sane tedun nyarengin rombongan Gubernur makanten wenten Sekretaris Daerah Provinsi Bali Dewa Made Indra, Kepala BBPJN VIII I Ketut Dharmawahana, Kepala Dinas PU Provinsi Bali I Wayan Astawa Riadi miwah Kepala Biro Humas lan Protokol Setda Provinsi Bali AA Ngurah Oka Sutha Diana.
Panureksan sane kapertama kamargiang olih rombongan ring 3 titik, sane pamargin proyeknyane wawu pisan kakawitin. Raris ngalantur mamargi nuju ke titik 4 sane pamargin proyeknyane pacang kalaksanayang ring galah sane nampek puniki, miwah sane kaping untat nureksanin kemajuan pembangunan sane sampun mamargi ring titik 5 miwah 6. Ring makakalih titik puniki, proses pembangunan sampun puput sawatara 51 persen.
Pamekas majeng ring pelaksana proyek, Gubernur Koster ngicenin piteket mangda dane makasami satata ngemit tur mecikang pisan kualitas pembangunan. Sajabaning punika, kapakelingin taler mangda satata ngamargiang pendekatan utawi masuaka antuk tata laksana sane patut majeng ring krama sane keni dampak.
"Titiang mapinunas majeng ring pihak balai lan kontraktor mangda sumeken tur satia ngamargiang swadharma antuk ngemit tur mecikang kualitas pakaryan. Tur sane dahat mabuat pisan, yening tambis-tambis utsaha ring sajeroning pawangunan proyek puniki keni panglimbaknyane sareng krama mapaiketan ring pakaryan fisik, sampunang nyantos ngawetuang biuta napimalih rebat majeng ring kramane," baos Gubernur saking Desa Sembiran, Buleleng puniki.
Gubernur sane taler pinaka Ketua DPD PDI Perjuangan Provinsi Bali punika mapangapti, pendekatan sareng para krama saking riin sapatutnyane kamargiang antuk tata laksana sane becik tur susila, dadosnyane sang sapa sira ugi sane keni imbas prasida uning tur lascarya ring usaha sane kantun kamargiang olih pemerintah, wantah matatujon anggen ngawerdiang kabecikan majeng ring kramane inucap.
"Napi sane sampun kamargiang lan kautsahayang olih pemerintahe puniki madue kawigunan nenten wantah majeng ring wawidangan Buleleng miwah Tabanan kemanten, nanging taler (jalan, red) pacang kawigunayang olih makasami krama, salanturipun pacang kawigunayang dados jalur wisata sane prasida ngawinan para wisatawane sayan nyaman malila cita ke Bali antuk ngalintangin jalur Singaraja-Denpasar," baos Gubernur Koster ngawewehin.
Gubernur nyobyahang, yadiastun dana ngawangun jalan/margi puniki mawit saking APBN, nanging Pemerintah Provinsi Bali sampun nyiagayang dana Rp.230 Miliar anggen pembebasan lahan lan ngaryanin umah pangentos anggen genah hidup majeng ring krama sane keni penggusuran.
"Kakaryanin umah anyar sane lintang becik yen saihang sareng umah witnyane, jangkep madaging sanggah sampun kakaryanin," baos dane Koster nyobyahang. Manut Koster, puniki wantah tata cara sane pinih beradab tur mautama rikala pacang ngarepin pikobet ring pantaraning krama, dadosnyane krama prasida nerima penggusuran jagi anggen pembangunan jalan/margi.
"Sakadi ring titik 3 punika, Pak Sudiarta seneng pisan, duaning ipun prasida polih margi ring ajeng umahnyane sane dahat linggah utawi jimbar lan polih umah sane anyar. Antuk tanah sane kabebasang, makahawinan total ipun polih jinah akehnyane pat miliar rupiah," baos mantan anggota DPR RI puniki.
Manut dane, puniki wantah pendekatan sane anyar, sane kamargiang olih Pemprov Bali duaning nyelehin ring sajeroning tata cara ngarepin pikobet ring pantaraning krama sajeroning pawangunan infrastruktur sering kirang becik utawi beradab. "Kramane sampun ledang nukung kemanten sampun becik. Duaning punika, kebutuhan dasarnyane sakadi umah sane patutnyane kagingsirang, mangkin iraga patut ngaryanin ipun umah sane anyar. Salami puniki ten wenten panggih kadi punika, jadma sane jagi kagingsiran ton sakadi nundung ubuhan kemanten, dadosne ten pisan becik kacingak yening kadi punika pamargine," baosnyane.
Sajabaning prasida ngirangin galah yening jagi mamargi, jalan sane anyar Mengwitani-Singaraja pacang ngawinang akeh ngidikang tikungane, dadosnyane pamargine prasida sayan nyaman. Indik puniki pacang mapuara becik majeng ring widang pariwisata miwah perekonomian Bali.
Ring sajeroning panureksan punika prasida jenar kapanggih parindikane, sajabaning titik 5-6 sane karincikang puput awarsa puniki, taler titik 3-4 sane wawu pacang kakawitin. Titik 7-8 pangrancanannyane pacang kamargiang ring warsa 2020, miwah titik 1-2 lan 9-10 sane riin karencanayang warsa 2021, wenten kliab pacang kariinin malih dados ring warsa 2020.
"Daweg titiang mababaosan sareng Bapak Mentri duk tanggal 18 Mei sane sampun lintang, dane nyawis pacang kagelisin pengerjaannyane dadosne prasida puput ring warsa 2020," baos Gubernur Koster nalatarang. (Balitopnews.com / Amo Bali )
Komentar