Putri Koster Mapekeling Mangda Mawali Nangiang Desain Mode Bertajuk Ornamen Bali
- 08 Juni 2019
- 13:29 WITA
- News
Balitopnews.com, Denpasar
Ketua Dewan Kerajinan Nasional Daerah (Dekranasda) Provinsi Bali, Ny. Putri Suastini Koster mapakeling tur nyarengin para desainer muda pamekas saking para yowana utawi generasi milenial mangda mawali nangiang industri mode bertema seni budaya Bali, sakadi sane ngalimbak ring warsa 80-an.
Indik punika kasobyahang olih Ibu Putri Suastini sane taler pinaka rabin Gubernur Bali Wayan Koster ring sambrama wacanannyane rikala mungkah acara fasion Bali Mode sane kaping 6 warsa 2019 magenah ring Level 21, Denpasar duk rahina Sukra (7 Juni 2019).
Inggian ring parikrama sane kadagingin antuk mamerang makudang-kudang mode desain sane mamuat tema ornamen khas Bali sakadi ring wentuk papatran (sarwa tumuwuh/papayonan), kakarangan (baburon) miwah nuansa seni budaya Bali sane tiosan.
"Ring warsa 80-an, akeh desainer Bali sane ngamedalang desain mode bertajuk seni budaya Bali, nyantos mrasidang kaloktah ka dura nagara. Ngiring ngawit mangkin limbakang malih, pamekas antuk ngamedalang karya-karya saking desainer yowana utawi generasi milenial Bali. Sampun janten desainnyane patut kaanutang antuk pembaharuan ring aab jagat sakadi mangkin," kadi punika dane miteketin.
Ibu Putri Koster sane ring warsa 80-an nyantos 90-an kaloktah pinaka seniman kondang sane pradnyan puniki, raris mapangapti antuk kamargiangnyane makudang-kudang parikrama fasion sakadi Bali Mode pacang prasida ngentenin tur nudut kahyun desainer yowana Bali mangda prasida ngaripta makudang karya desain sane maderbe kualitas berdaya saing nasional tur internasional. Makudang karya desain punika, sampun janten nginggilang kearifan lokal Bali sakadi ngangge bahan dasar kain endek. "Titiang mapangapti majeng ring para desainer yowana iraga mangda prasida ngaripta desain saking bahan dasar endek mangda prasida go nasional nyantos internasional," baos dane.
Duaning punika, kapungkur dane mapangapti makudang-kudang parikrama sane pateh mangda satata kamargiang tur kalimbakang tatujonnyane mangda prasida sayan nukung kemajuan sentra-sentra produksi busana saking Bali dadosnyane kahanan pasar busana Bali sayan ngalimbak nyantos ke dura Bali, sakadi sane polih kebut duk warsa 80-an.
"Sayan sering ngamargiang parikraa sakadi puniki, titiang mapangapti prasida numbuhang UKM-UKM ring Bali sakadi ring warsa 80-an, duk punika akeh garmen-garmen sane tumbuh tur ngalimbak anggen negepin keperluan miwah pasuh saking dura Bali," asapunika dane nalatarang. "Puniki wantah becik pisan, pacang prasida nyerep akeh tenaga kerja. Punika makahawinan dahat mabuat pisan peran pemerintah ring sajeroning utsaha puniki. Ngiring iraga ngawangun sinergi matatujon ngawerdiang kemajuan UKM ring Bali," dane ngawewehin.
Peran pemerintah sakadi sane kaaptiang olih dane wantah marupa standarisasi harga majeng ring produk-produk sane kaadol antuk UKM. Standar harga pokok UKM puniki kaperluang mangda nenten nyantos ngawetuang persaingan sane nenten becik nyantos mapuara ngarusak harga/prabea barang ring pasar. Tios ring punika, patut taler wenten sertifikasi mutu anggen nyaga tur nyamin kelayakan kualitas produk utawi barang sane kaadol.
Sajabaning punika, sane mrakarsanin Bali Mode Putu Ayu Weda Srithi maosang parikrama puniki kamargiang antuk tatujon nukung nincapang perekonomian ring Bali, pamekasnyane elaku UKM.
Acara puniki taler karuntutin antuk peragaan makudang busana saking para desainer yowana Bali. (Balitopnews.com/Amo Bali)
Komentar