Gubernur Koster Nyarengin Jokowi Nyukserahang Tigang Tali Sertifikat Tanah ring Bangli
- 14 Juni 2019
- 11:24 WITA
- News
Balitopnews.com, Bangli
Presiden RI Ir. H. Joko Widodo kasarengin Ny. Hj. Iriana Joko Widodo miwah Gubernur Bali Wayan Koster lan Ibu Putri Suastini Koster antuk simbolis nyukserahang 3000 sertifikat bidang tanah se-Bali.
Panyukserahan puniki sapisanan dados bagian ring sajeroning target penyertifikatan makasami bidang tanah ring Bali. Indik puniki kasobyahang ritatkala Presiden sane biasa kaadegang parab Jokowi puniki ngamargiang kunjungan kerja ring Lapangan Ki Lobar, Taman Bali, Bangli, rahina Sukra (14 Juni 2019).
"Rahina mangkin mawali malih iraga nyukserahang tigang tali sertifikat bidang tanah, puniki kantun akidik. Sapatutunyane ring makasami wawidangan Indonesia punika wenten 126 juta sertifikat. Per warsa 2014, wawu wenten sawatara 46 juta, dadosnyane kantun kirang sawatara 80 juta sertifikat. Puniki sane terus titiang kejar. Titiang nargetin 56 juta sertifikat puput nyabran warsannyane. Yening mrasidang kalaksanayang, iraga madue ancang 2025 makasami sertifikat sane 80 yuta prasida kaicenin lan iraga patut bersyukur. Pamekas Provinsi Bali, kapungkur kapertama makasami sertifikat pacang kapuputang ring warsa puniki. Bali wantah provinsi sane kapertama sane makasami prasida ngamel sertifikat," baos Jokowi.
Penyertifikatan makasami bidang tanah ring Indonesia manut Jokowi dahat mabuat pisan, duaning sering pisan metu wicara lahan ring Indonesia, ngawit lingkup sane paling alit inggih punika ring pantaraning kulawarga nyantos ring pantaraning asiki krama sareng kelompok, nyantos ring pantaraning kelompok, nyantos pantaraning lembaga.
"Sertifikat wantah pinaka bukti hak hukum atas bidang tanah sane kadruwenang. Puniki sane ngukuhang. Duaning punika patut kagemel, mangda nenten malih wenten wicara. Risampune puniki, titiang nunas mangda kafoto-copy, punika sane kagamel, aslinnyane simpen becik-becik," baos Jokowi mapakeling.
Tios ring punika, penyertifikatan puniki kaaptiang olih Jokowi mangda prasida ngawantu krama sane ngamerluang pinjaman pemodalan utawi utsaha. Duaning sertifikat prasida kadadosang anggunan pinjaman. Nanging, dane tetep mapinunas mangda upaya punika karincikang tur kawilangin becik-becik dumun, mangda nenten ngawetuang pikobet sane anyar ri kapungkur wekas. "Titiang mapatitip anggen punika pinaka modal kerja, modal investasi, sampunang anggen sane tios-tiosan. Dados anggen jaminan, nanging anggen ngupayang indik-indik sane produktif, sane ngasilang pikolih. Durus wilangin becik-becik, selehin dumun bunga/anakan pamutrannyane, sampunang kapaksanin. Krama iraga puniki biasannyane maderbe sertifikat punika kagadeang mangda polih pinjaman/pamutran, polih Rp.300 juta pastika bagia ten? polih Rp. 150 juta mrasidang numbas mobil. Nenten prasida naur cicilan, 6 bulan mobil kaambil olih dealer," baos Jokowi sinambi kasanggra ica-ican para uleman sami.
Skadi sane sampun kasobyahang sadurungnyane, Menteri ATR/BPN Sofyan Djalil nguningayang nyantos mangkin 83 persen saking 1,8 juta bidang tanah ring Bali sampun maderbe sertifikat. Sofyan maosang wenten 180 tali bidang tanah malih sane perlu kaicen sertifikat mangda nenten ngawetuang sengketa/wicara. "Nyantos mangkin saking 147 tali sane patut titiang puputang ring warsa 2019, sampun 66 tali puput sertifikatnyane. Dadosnyane Provinsi Bali sane kapertama makasami tanahnyane maderbe sertifikat," baos dane. (Balitopnews.com/Amo Bali)
Komentar