Sasolahan Wengi PKB, Koster: Seni wantah Media sane Pinih Becik anggen Ngaruruh Persatuan
- 16 Juni 2019
- 12:19 WITA
- News
Balitopnews.com, Denpasar
Gubernur Bali Wayan Koster mapangapti majeng ring makasami krama Bali mangda angayu bagia tur maledang kahyun ring sajeroning parikrama Pesta Kesenian Bali (PKB) sane kaping 41 warsane puniki.
"Dadosang parikrama PKB puniki pinaka pestannyane krama Bali, mangda sami ledang tur masuka rena, mapupul tur saling sagilik-saguluk. Ngiring iraga numbuhang rasa trepti majalaran antuk tradisi, seni, miwah budaya iraga sane adiluhung," baos Gubernur Koster ring sajeroning sambrama wacanan dane rikala Sasolahan Wengi Pamungah PKB sane kaping 41 magenah ring Panggung Terbuka Ardha Chandra, Taman Budaya Art Centre, Denpasar, dina Saniscara wengi (15 Juni 2019).
Kesenian ring Bali manut Koster, sakadi oksigen sane prasida kahirup ring dija kemanten, pinaka silih sinunggil sarana utawi media anggen nyelehin Bali sane sujati. "Yadiastun wenten dinamika utawi pakibeh ring pantaraning krama, janten iraga eling wantah seni sane mrasidang ngaraketang iraga malih. Seni wantah sarana sane pinih utama majeng ring iraga anggen ngaruruh sane kabaos persatuan punika," baosnyane.
PKB warsa sane mangkin, sane ngambil tema 'Bayu Pramana' utawi sane maartos kawisesan angin kabaosang olih Koster sampun katata antuk becik tur kreatif pisan. "Iraga karyanin mangda prasida komit sareng tema sane wenten tatujonnyane mangda nyihnayang rupa sane anyar, nenten monoton," baos dane.
"Tios ring punika, PKB sane mangkin taler madue komitmen ring sajeroning kebijakan-kebijakan miwah visi 'Nangun Sat Kerthi Loka Bali.' Sakadi nganggen busana adat Bali, aksara lan sastra Bali, kampanye pengurangan mis plastik nyantos ngawigunayang produk pertanian miwah industri lokal," baos Gubernur sane embas ring Sembiran, Buleleng puniki.
Utsaha ring sajeroning nukung industri lokal taler kacihnayang antuk terobosan mangda ngicenin stand gratis majeng ring pamilet pameran inggian punika saking pelaku UMKM lokal. "Sajabaning punika, iraga taler mautsaha numbuhang malih sekaa sebun ring soang-soang desa adat, sane salami puniki sampun ngemit kukuhnyane agama, adat tradisi ring Bali," baosnyane.
Mungkah PKB warsa sane mangkin, kamargiang sasolahan oratorium sane mamurda "Bali Padma Bhuana" saking ISI Denpasar. Fragmen Sendratari sane nyatuayang Raja Dalem Waturenggong sane madeg agung ring Bali duk abad 16 Masehi, antuk utsaha-utsahannyane anggen ngemit kasukertan miwah karahajengan panjaknyane ring Bali. Inggian upaya sane kamargiang punika sakadi ngamargiang upacara Nangluk Marana miwah Eka Dasa Ludra tur nulad kautaman raja-raja sadurungnyane.
Ring acara sasolahan pamungkah punika, makanten taler rauh Wakil Gubernur Bali Tjokorda Oka Artha Ardana Sukawati, Sekda Dewa Made Indra, Ketua DPRD Nyoman Adi Wiryatama miwah uleman para sulinggih, pemuka agama, konsulat negara sahabat, tokoh masyarakat, miwah panyiuan krama. (Balitopnews.com/Amo Bali)
Komentar