Gubernur Koster Mapiteges Pawangunan Patut Kadasarin antuk Kearifan Lokal
- 01 Agustus 2019
- 01:44 WITA
- News
Balitopnews.com, Denpasar
Gubernur Bali Wayan Koster mapiteges sampun sapatutnyane refenrensi sistem pawangunan patut kadasarin antuk kearifan lokal. Napimalih pamekasnyane majeng ring Bali, seni lan budaya sampun dados siki ring makasami sendi kahuripan krama Bali. Dadosnyane seni budaya puniki prasida dados modal sane mabuat sajeroning utsaha pawangunan sane kadasarin antuk kearifan lokal.
Duaning kadi asapunika, seni lan budaya Bali patut katitenin saking hulu nyantos ke hilir. Mapaiketan ring indik kadi asapunika, makahawinan Institut Seni Indonesia (ISI) Denpasar maderbe peran sane mabuat tur strategis. Kadi asapunika kasobyahang olih Gubernur Bali Wayan Koster rikala ngicenin sambrama wacana ring acara Sidang Terbuka Senat Institut Seni Indonesia Denpasar mapaiketan ring Parikrama Dies Natalis XVI ring Kampus ISI Denpasar, Buda (31 Juli 2019).
Peran punika, manut Gubernur Koster wantah ngamargiang misi manut ring tugas/swdharma pokok miwah fungsi/kawigunan sakadi sane sampun katitenin sajeroning undang-undang/uger- uger. Indik punika kapikelingin duaning ISI Denpasar wantah bagian saking institusi Kemenristekdikti RI. "Nenten wantah punika, mangda napi sane dados misi kementerian kaanutang sareng kepentingan daerah,"; baos Gubernur Koster.
Dane maosang ISI madruwe peran sane dahat mabuat pisan ngamargiang Tri Dharma Perguruan Tinggi sane batangnyane inggih punika pendidikan, penelitian, miwah pengabdian majeng ring krama/masyarakat. Tios ring punika, ring sisi sane tiosan Pemprov Bali maderbe prioritas ngamargiang visi Nangun Sat Kerthi Loka Bali malarapan antuk Pola Pembangunan Semesta Berencana.
Duaning punika, Gubernur Koster sampun ngarincikang makudang program sane tatujon ipun anggen nincapang eksistensi seni lan budaya. Utsaha punika sakadi ngicenin beasiswa majeng ring mahasiswa, miwah sapisanan nyarengin mahasiswa mangda sareng-sareng maparidabdab sareng Pemprov Bali ring sajeroning utsaha pemberdayaan masyarakat.
Raris pinaka cihna komitmen nyarengin perguruan tinggi, Gubernur Koster maderbe pangrancana ngicenin penglolaan Art Center majeng ring ISI Denpasar dadosnyane prasida kawigunayang antuk utsaha sane maksimal.
Rektor ISI Denpasar Prof. Dr. I Gede Arya Sugiartha, S.SKar., M.Hum ring sajeroning atur piuningnyane maosang kukuhnyane paham logosentris makahawinan metu perubahan sakadi praktek berkesenian sane akehan nenten ngalinguang nilai tradisional. Tios ring punika, wentennyane pengaruh saking kapasitas pasar makahawinan komodifikasi sane sampun ngalimbak makahawinan kahuripan seni sampun sayan nuju proses ngarereh nilai tambah material. "Seni kadadosang pinaka objek eksploitasi politik miwah kepentingan- kepentingan saking jaba/luar, nyantos metu parindikan sane nenten anut ring fitrah/taksu seni punika," baos nyane.
Dane ngawewehin anggen ngaruruh cita-cita ;"memuliakan seni budaya nuju Indonesia digjaya,"; ISI Denpasar sampun ngamargiang makudang-kudang program rutin ring widang pendidikan, penelitian, penciptaan, pengabdian majeng ring krama/masyarakat miwah kerjasama.
Prof. Sardono Waluyo ring sajeroning orasi ilmiahnyane maosang Bali malarapan antuk seni lan budayannyane madruwe modal sane kuat anggen ngawerdiang pariwisata sane berkelanjutan. Indik punika patut kapikelingin olih daerah-daerah sane tiosan ring panagara Indonesia sane sedeng maparidabdab ngalimbakang industri pariwisata mangda nenten kadesek antuk pakibeh pariwisata punika.
Manut dane ngemit lokalitas wantah parindikan sane dahat mabuat ring aab jagat sakadi mangkin. "Industri kreatif wantah peluang, soang-soang daerah patut, nenten wantah ngemit ilmu pengetahuan/knowladge, nanging mangda maderbe kawigunan pinaka inkubator inovasi sane ngawetuang karya industri kreatif sane prasida masaih ring dunia internasional," baosnyane. (Balitopnews.com / Amo Bali )
Komentar