Wagub Cok Ace Nglepas Pamilet Road Bike GFNY, Nyarengang 1.900 Pesepeda saking 30 Panegara
- 07 Agustus 2022
- 22:08 WITA
- News
GIANYAR, Balitopnews.com - Wakil Gubernur Bali Prof. Tjokorda Oka Artha Ardhana Sukawati (Cok Ace) nglepas para pamilet road bike Gran Fondo New York (GFNY) Championship Asia ring kilometer 19.9 Jalan By Pass Prof. Dr. Ida Bagus Mantra Gianyar, Redite Kliwon Medangkungan tanggal 7 Agustus 2022. Parikrama sane nyarengang 1.900 pamilet saking 30 panegara puniki kakepah dados kalih jarak tempuh minakadi long (137 km) miwah medium (102 km), nglintangin pasisi wiadin gunung ring wewidangan Bali Timur. Parikrama puniki, tiosan nyarengang pesepeda professional, taler kasarengin krama umum. Kapolda Bali Irjen. Pol. Drs. Putu Jayan Danu Putra, S.H., M.Si, Wakapolda Bali Brigjen. Pol. Drs. I Ketut Suardana, M.Si kasarengin makudang pejabat Mabes Polri taler ngramianin parikramane puniki.
Sajeroning sambrama wacanannyane, Wagub Cok Ace rumasa gargita saantukan parikrama sakadi puniki mawali prasida kamargiang riantukan selami puniki katiben pandemi Covid-19. Sangkaning punika, Titiang ngaturang suksma majeng samian angga sane sampun midabdabin parikrama puniki mawinan akeh ngrauhang pamilet. “Puniki daha ngangobin, selamat ring prawartaka acara miwah para pamilet sane antuk pikedeh ageng ngamiletin parikrama puniki,” baosnyane sinambi ngajiang becik indik pemilihan rute sane ngawinang para pamilet prasida nyantenang kaluihan palemahan Bali ring sisi kangin sakadi Karangasem.
Tios ring punika, Dane maosang yening parikrama puniki prasida digelis ngwaliang pariwisata Bali. “Ring salantang rute sane kalintangin, titiang nureksain para pamilet jagi akeh ngambil foto miwah kaupload ring media sosial suang-suang. Puniki dahat becik majeng pariwisata Bali, jagi mawesana majeng ekonomi saha becik taler kaanggen promosi pariwisata. Riantukan potensi sane kaduwenang Bali wantah kaluihan palemahan kalih budaya,” baosnyane. Dane ngaptiang samian pamilet prasida muputang rute sane sampun kakaryanin olih panitia saha prasida kantos rauh ring garis finish. Ring pamuput baosnyane,Dane ngaptiang mangda ring salanturnyane sayan akeh parikrama nasional wiadin internasional sane kalaksanayang ring Pulo Dewata.
Patut kauningin, GFNY wantah seri marathon olahraga sepeda skala Internasional sane kalaksanayang ring 19 panegara antuk akeh pamilet 30.000 satunggil warsa kepah dados kejuaraan regional ring makudang panegara matiosan miwah kejuaraan dunia ring New York, Amerika Serikat. GFNY Indonesia pinaka pahan saking GFNY World Series sane sampun kalaksanayang saking warsa 2016.
Pamilet saking sajebag Indonesia rauhing dura negara sakadi Malaysia, Singapura, Thailand, Hongkong, Inggris, Prancis, Italia, AS miwah panegara tiosan kaaptiang prasida nangiang malih ekonomi Indonesia pamekas Bali. Pamilet pinih becik ring pamargin GNFY Bali 2022 jagi berangkat ka New York AS sajeroning ngamiletin World Championship warsa 2023. Mangda parikrama sayan ramia, taler kalaksanayang Bike Expo saking tanggal 5-7 Agustus ring Gianyar.
Pelepasan pamilet GNFY Bali 2022 olih Wagub Cok Ace kasaksiang olih Sekretaris Jenderal Pengurus Besar Ikatan Sport Sepeda Indonesia (Sekjen PB ISSI) Parama Nugroho miwah Direktur Poltekpar Bali, Drs. Ida Bagus Putu Puja, M.Kes. ( Rls/Btnc)
Komentar