Wagub Cok Ace Nlatarang Mabuatnyane Perda Tata Titi Pamargin Cadangan Pangan Pemerintah Provinsi ring Ajeng Anggota Dewan
- 08 Agustus 2022
- 15:08 WITA
- News
DENPASAR, Balitopnews. com - Manut daging Pasal 24 Ayat 1 Peraturan Pemerintah Nomor 17 Warsa 2019 indik Ketahanan Pangan miwah Gizi kabaosang yening geguat salanturnyane mapaiketan ring tata cara pamargin cadangan pangan pemerintah provinsi minakadi melarapan peraturan daerah provinsi.
Manut data saking Badan Ketahanan Pangan Kementerian Pertanian kantos panguntat warsa 2021 wenten empat (4) provinsi sane durung madue Peraturan Daerah Ketahanan Pangan, minakadi Provinsi DKI Jakarta, Provinsi Maluku Utara, Provinsi Sulawesi Tenggara rumasuk Provinsi Bali, saha 30 provinsi tiosan sampun madue Peraturan Daerah cadangan pangan pemerintah provinsi. Parindikan puniki kabaosang Wakil Gubernur Bali Prof. Tjok. Oka Sukawati ri kala nlatarang penjelasan Kepala Daerah sajeroning Rapat Paripurna ka-21 DPRD Provinsi Bali Masa Persidangan II Warsa 2022, Soma Umanis Wuku Medangkungan (8 Agustus 2022)
Dane ngawewehin, pengembangan penyelenggaraan cadangan pangan pemerintah provinsi sane sampun kalaksanayang majeng program pokok (beras) wantah pinaka pidabdab strategis sajeroning nyokong penyediaan cadangan pangan ngarepin kakirangan pangan sangkaning panincap pangarga, bencana, bencana sosial utawi sangkaning kahanan darurat.
Parindikan puniki adung sareng visi “Nangun Sat Kerthi Loka Bali” melarapan Pola Pembangunan Semesta Berencana nyujur Bali Era Baru. Sajeroning nagingin visi puniki, pemerintah daerah antuk misi kapertama minakadi mastikayang kawentenan pangan antuk akeh miwah kualitas sane becik majeng kramane.
Penyelenggaraan cadangan ketahanan pangan matetujon ngicen geguat majeng Pemerintah Provinsi, Pemerintah Kabupaten/Kota wiadin krama sajeroning ngrincikang kawentenan cadangan pangan ring wewidangannyane. Mangda sayan dangan sepisanan nincapang akses pangan majeng krama sane kahanannyane darurat wiadin krisis pangan, minakadi sangkaning bencana alam wiadin bencana sosial, mawinan kawentenan wantuan pangan majeng krama patut kasalurang sajeroning nambakin kakirangan pangan, panincap pangarga pangan, bencana alam, bencana sosial wiadin sangkaning kahanan darurat.
Penyelenggaraan cadangan pangan pemerintah provinsi kalaksanayang melarapan pengadaan, penyaluran wiadin pengelolaan sane becik. Parindikan puniki kapolihang melarapan antuk pembelian produksi saking dalam daerah antuk ngutamayang mutu, kualitas saha aman, miwah antuk pangarga sane sampun katentuang olih pemerintah.
Mapaiketan ring penyelenggaraan cadangan pangan Pemerintah Provinsi, Perangkat Daerah prasida ngwangun kanti sareng Badan Usaha Milik Daerah miwah lembaga masyarakat utawi koperasi sane kaunggahang malarapan antuk perjanjian kerjasama.
Tiosan punika sajeroning nyokong era digitalisasi Pemerintah Daerah setata ngwangun, ngrincikang saha nglimbakang sistem informasi cadangan pangan sane terintegrasi. Sistem informasi kaanggen sajeroning perencanaan pemantauan evaluasi wiadin stabilisasi pasokan miwah pangarga pangan wiadin nglimbakang sistem perimbangan majeng pikobet pangan.
Penyaluran cadangan pangan Pemerintah Daerah, taler prasida kawigunayang pinaka wantuan pangan majeng krama tuara utawi sane ngranjing kahanan rawan pangan wiadin rawan gizi, saha kaicen majeng wewidangan tiosan sane muatang wantuan.
Mapaiketan ring punika krama taler madue amongan ngardi cadangan pangan Pemerintah Provinsi melarapan pamargin produksi, pengadaan, pengelolaan wiadin penyaluran pangan, pencegahan rauhing penanggulangan masalah pangan, pemberian data kalih informasi sane patut nganinin indik rawan miwah krisis pangan. Sajeroning nambakin kawentenan rawan miwah krisis pangan mawinan penyaluran bantuan pangan wiadin pengawasan majeng penyelenggaraan cadangan pangan daerah prasida kalaksanayang antuk sinarengan. (Rls/Btnc)
Komentar