Ketua TP PKK Ngamiletin Gebyar Merah Putih ring MPRB Kakawitin antuk Gerakan Pembagian 10 Yuta Bendera
- 09 Agustus 2022
- 23:08 WITA
- News
DENPASAR, Balitopnews. com - Ketua TP PKK Provinsi Bali Ny. Putri Suastini Koster ngamiletin parikrama Gebyar Merah Putih ring Monumen Perjuangan Rakyat Bali (MPRB), Renon, Anggara Paing Medangkungan tanggal 9 Agustus 2022.
Parikrama Gebyar Merah Putih puniki kalaksanayang Pemprov Bali pamekas Satuan Polisi Pamong Praja sajeroning ngramianin pakeling wanti warsa Provinsi Bali ka-64 miwah wanti warsa RI ka-77.
Gebyar Merah Putih ramia pisan antuk nyarengang 500 pegawe Pemprov Bali. Antuk makta bendera sane sampun kasiagayang, samian mabaris ngiderin lantai 1, 2 miwah 3 MPRB. Lantai 1 kadagingin antuk 300 pegawe, ring lantai 2 miwah 3 kadagingin minakadi antuk 120 diri pegawe miwah 80 diri pegawe.
Tiosan punika, parikrama taler nyarengang anggota pramuka sane mabaris ring undag sisi kelod monumen sane ketah kabaosang Bajra Sandhi.
Pamargin gebyar merah putih kadulurin antuk nyukserahang bendera utama saking Kasatpol PP Dewa Nyoman Rai Dharmadi majeng Sekretaris Daerah Provinsi Bali Dewa Made Indra sane kasarengin Kalaksa BPBD Bali I Made Rentin miwah Kadis Kebudayaan I Gede Arya Sugiartha.
Kadulurin antuk kibaran bendera olih Sekda Dewa Indra, pamalet sane wenten ring lantai 1, 2 miwah 3 antuk sinarengan nyarengin ngibarang bendera. Salanturnyane samian sane makta bendera ring suang-suang lantai ngiderin MPRB sinambi ngibarang Bendera Merah Putih.
Kedeh para pamilet sayan ageng ri kala Ny.Putri Koster ngwacen sajak sane kaambil saking gagendingan ‘Merah Putih’ pikardin I Gde Dharna. Pangwacenan kairing antuk gending ‘Merah Putih’ sane kagendingang olih samian pamilet pengibar bendera.
Ri kala kawawancara ring selagan parikrama, Ny. Putri Koster nyanggra becik parikrama puniki pinaka pahan saking pangupaya nangiang semangat kemerdekaan. “Puniki wau pinaka pangawit dudonan pakeling wanti warsa Kemerdekaan sane ka-77. Malarapan parikrama puniki ngiring uripang saha tangiang semangat kemerdekaan kantos ring pucak pakeling tanggal 17 Agustus,” baosnyane.
Manutnyane parikrama Gebyar Merah Putih sane kakaryanang video miwah pembagian bendera wantah silih tunggil pamargi nangiang saha ngelingang kramane indik semangat kamahardikan.
Dane ngawewehin, silih tunggil pamargi sajeroning nyemertiang kemerdekaan minakadi antuk ngresepang saha nglaksanayang Tri Sakti Bung Karno minakadi berdaulat ring widang politik, berdikari ring widang ekonomi, miwah berkepribadian ring widang kebudayaan. “Ngiring titenin laksana sajeroning ngardi kadigjayan kalih kekuatan bangsa,” baosnyane. Saantukan manutnyane, napi sane kakardinin olih para kramane ring galahe mangkin jagi katamiang olih generasi salanturnyane. “Pateh kadi galahe mangkin, iraga sareng sami akeh nulad semangat para pejuang sajeroning ngaruruh kamahardikan. Napi sane kalaksanayang ring galahe mangkin taler prasida dados tetuladan generasi salanturnyane. Sangkaning punika, iraga sareng sami patut mautsaha nglaksanayang parilaksana sane becik,” baosnyane.
Tiosan ring punika, anak istri sane taler pinaka Ketua Dewan Kerajinan Nasional Daerah (Dekranasda) Bali nyarengang para yowana mangda nulad semangat para panglisire riin sajeroning nagingin kamahardikan mangda Bangsa Indonesia prasida masanding sareng panegara tiosan.
Kasatpol PP Dewa Rai Dharmadi ngawewehin, parikrama puniki matetujon nangiang malih jagat Bali sesampune katiben pandemi Covid 19 sane banget ngicen pawesana kaon majeng kauripan krama Bali. “Melarapan pakeling wanti warsa Provinsi Bali sane ka- 64 miwah wanti warsa RI ka-77 puniki, iraga sareng sami nguripang saha nangiang malih semangat miwah kepercayaan diri nyanggra Bali Era Baru, saking Bali Pulih Bersama, Tumbuh Bersama, Hidup Bersama, Berkembang Bersama, Kuat Bersama, Manfaat Bersama, nyujur Indonesia Pulih Lebih Cepat, Bangkit Lebih Kuat,” baosnyane.
Gebyar Merah Putih ring MPRB kalanturang antuk pembagian 10 yuta bendera sane kadulurin antuk simbolis olih Ny. Putri Koster malarapan masang bendera ring sepeda motor duwen krama sane nglintang ring Jalan Raya Puputan. Bendera sane kaicen pinaka sumbangan saking samian OPD Pemprov Bali.(Rls/Btnc)
Komentar