Nglimbakang Literasi Digital, Diskominfos Provinsi Bali Nglaksanayang Lomba Video Pendek
- 07 Maret 2023
- 17:03 WITA
- News
DENPASAR,Balitopnews.com - Sajeroning nglimbakang saha nyobyahang indik kawentenan Literasi Digital ring Provinsi Bali, Dinas Komunikasi Informatika dan Statistik Provinsi Bali melarapan Bidang Informasi dan Komunikasi Publik nglaksanayang Lomba Video Pendek Literasi Digital Warsa 2023.
Lomba sane ngunggahang unteng “ Lomba Video Pendek Literasi Digital “Cerdas Bermedia Sosial ” warsane puniki kaulengang ring substansi edukasi digital ethic utawi etika berdigital. Contonyane minakadi nambakin panglimbak gatra hoax, nambakin ujaran kebencian wiadin pisuna utawi fitnah, nambakin kawentenan pencemaran nama baik, waspada pemerasan wiadin penipuan online, nambakin kawentenan judi online wiadin nambakin panglimbak pornografi.
Kepala Bidang Informasi dan Komunikasi Publik pinaka Pejabat Pelaksana Teknis lomba, Anak Agung Ngurah Bagus Aryana nlatarang, parikrama lomba katujuang majeng krama umum sane wenten ring Bali. “ Majeng pendaftaran pamilet kalaksanayang saking bulan Maret – 31 Mei 2023,” baos Aryana daweg rahina Anggara (7 Maret 2023) ring Denpasar. “ Majeng panureksan, angga juri lomba mawit saking unsur Pemerintah Provinsi Bali, Praktisi Literasi Digital, Akademisi, Praktisi Seni wiadin Penggiat Media Sosial,” baosnyane.
Aryana ring galahe punika ngaptiang mangda pamargin lomba prasida mamargi antar saha kamiletin antuk akeh pamilet “Sayan akeh kramane sane nyarengin lomba puniki, majanten ngwantu pidabdab sosialisasi Literasi Digital ring kramane,” baosnyane.
Tiosan sajeroning ngruruh gatra nganinin indik Literasi Digital majeng pabuat lomba, reriptannyane taler dados penyambung lidah ring kramane pamekas melarapan antuk sosmed. Saantukan reriptan sane kalombayang jagi kasobyahang ring sosial media duen Diskominfos Bali”, sakadi punika kabaosang antuk Aryana.
Pecak pejabat ring BAPPEDA Bali punika ngawewehin, lomba video pendek sane kalaksanayang kapertama puniki jagi nyediayang adiah marupa jinah, piala miwah piagam rauhing ring adiah favorit majeng pamilet antuk like, viewer wiadin share pinih akeh ring youtube Diskominfos Bali. “Sayan akeh sane like, viewer wiadin share sane kapupulang majanten sayan ageng selahnyane prasida munggah dados juara favorit. Titiang pinaka angga prawartaka acara, nureksain yening sayan akeh reriptan punika katonton, majanten sayan akeh sane uning saha eling indik literasi”, baosnyane.
Majeng krama sane kadaut kayunnyane nyarengin, indik gatra tegepnyane mapaiketan sareng lomba, prasida kawacen ring web diskominfos.baliprov.go.id. (Rls/Btnc)
Komentar