Gubernur Bali Deportasi 2 Krama Polandia Saantukan Mialangin Katreptian Rerahinan Nyepi
- 27 Maret 2023
- 18:03 WITA
- News
DENPASAR,Balitopnews.com - Gubernur Bali, Wayan Koster mawali ngambil tindakan tegas majeng Warga Negara Asing / Wisatawan Mancanegara sane nenten trepti, nenten disiplin, ngaonang citra wiadin kualitas pariwisata Bali, saha ngaonang budaya Bali, melarapan antuk nglaksanayang derpotasi majeng 2 Warga Polandia.
Makakalih Warga Polandia punika sampun mabukti ngaonang katreptian rerahinan Nyepi Warsa Saka 1945 ring rahina Buda Paing, Wuku Uye tanggal 22 Maret 2023 ring wewidangan Pasisi Purnama Sukawati, Kabupaten Gianyar.
Deportasi kalaksanayang langsung olih KanwilKemenkumham Provinsi Bali melarapan Kantor Imigrasi Kelas I TPI Denpasar majeng 2 Warga Polandia minakadi : 1) Karol Grabinski (40), No. Paspor : ER3610878, sane madue izin tinggal marupa Visa Kunjungan Saat Kedatangan; miwah 2) Barbara Karina Waiczak (25), No. Paspor : EL3609047, antuk izin tinggal marupa Visa Kunjungan Saat Kedatangan.
Risampune katureksain olih Kantor Imigrasi Kelas I TPI Denpasar, makakalih Warga Polandia sane kauningin rauh ring Indonesia daweg tanggal 28 Februari 2023 melarapan TPI antuk visa on Arrival saha kapikukuhang sampun mamurug majeng daging Pasal 75 ayat (1) UU No.6 Warsa 2011 indik Keimigrasian, mapaiketan sareng Orang Asing sane wenten ring wewidangan Indonesia sane nglaksanayang parikrama sane prasida ngawetuang baya saha patut katarka prasida ngaonang katreptian utawi mamurug majeng Peraturan
Perundang-Undangan kakeniang Tindakan Administratif Keimigrasian marupa Deportasi miwah Penangkalan.
Antuk punika WNA Polandia sane mapesengan Karol Grabinski miwah Barbara Karina Waiczak antuk resmi kaberangkatang tanggal 25 Maret 2023 melarapan penerbangan DPS-CGK-AUH-MXP-KRK, galah
keberangkatan 17.05 WIB, antuk tetujon Denpasar – Jakarta – Abu Dhabi – Malpensa – Krakow.
Gubernur Bali, Wayan Koster ring Siaran Pers, Redite Umanis, Menail tanggal 26 Maret 2023 ring Jayasabha, Denpasar sumeken maosang yening pamargin pariwisata Bali nenten kadadosang ngaonang harga diri Bangsa wiadin Negara Indonesia, saha Bali pamekas sajeroning nyaga Kepariwisataan
Bali. ”Yening wenten parindikan sane nenten anut sareng geguat hukum utawi Peraturan Perundang-Undangan sane wenten ring wewidangan Negara Kesatuan Republik Indonesia, wiadin budaya Bali, Titiang sampun ngwangun kanti sareng Bapak Kapolda
Bali miwah Bapak Kakanwil Kemenkumham Provinsi Bali sajeroning nglaksanayang tindakan tegas majeng para wisatawan utawi Warga
Negara Asing sane mamurug,” baos Gubernur Bali Wayan Koster. (Rls/Btnc)
Komentar