Ngresmiang Kawasan Produksi Produk Bedetan Perancak, Putri Koster Nyokong Olahan Ikan miwah Pindang dados Caciren Jembrana
- 02 Juni 2023
- 21:06 WITA
- News
JEMBRANA,Balitopnews.com - Ketua Tim Penggerak PKK Provinsi Bali Putri Koster nyarengang anggota Kelompok Wanita Tani Bedetan Perancak mangda setata nyaga karumaketan para bendega sareng angga sane mapaiketan sajeroning nglimbakang produksi bedetan (olahan ikan lemuru sane kakeringang) ring Perancak. Parindikan puniki kabaosang sajroning sambrama wacanannyane sadurung ngresmiang Kawasan Produksi Produk Bedetan Perancak Jembrana Kerthi Bali Research Center, ring Perancak - Jembrana, Bali, Sukra (2 Juni 2023)
"Ngiring dabdabang produksi bedetan saking Perancak puniki pinaka ciri khas Jembrana sane wantah prasida kapanggihin ring wewidangan Jembrana kewanten. Nanging, tiosan ring akeh produksi sane prasida nagingin pabuat pasar, nanging kawentenan rasa, karesikan wiadin kemasan taler patut kauratiang becik mangda kawentenannyane rajeg ring pasar," Baos Putri Koster.
Dane ngawewehin, TP PKK Bali nenten prasida makarya praragan, sangkaning punika, patut maprakanti sareng makudang angga ri kala nglimbakang wewidangannyane, silih tunggilnyane Kabupaten Jembrana, pinaka Kabupaten sisi kauh Pulo Bali sane madue potensi marupa pengolahan ikan miwah pindang, sane ring salanturnyane prasida kaanggen lakaran ajeng-ajengan, minakadi marupa olahan ulam kering, kerupuk wiadin sane tiosan. Napi malih ulam segara pinaka silih tunggil sumber protein ring angga sarira sane dahat becik majen otak. Tiosan nagingin gizi, ulam taler prasida ngicen pawesana becik majeng perputaran perekonomian krama irika, sane jagi mawesana majeng kasukertan krama irika.
"Ngolah sumber daya alam marupa ulam majanten dahat becik sajeroning ngukuhang kawentenan ekonomi kulawarga, nanging sane taler pinih mabuat yening pemenuhan kebutuhan pangan marupa ikan punika kaping ajeng prasida kaanggen ring kulawarga dumun, mawinan yening sampun kadi asapunika , majanten produksi sajeroning muter ekonomi keluarga melarapan produksi ikan saha salanturnyane katanjaang napi malih prasida kaekspor majanten dahat becik," Baos Putri Koster sane setata nureksain panglimbak produk UMKM ring Bali.
"Titiang pinaka Ketua Tim Penggerak PKK Provinsi Bali sane taler pinaka duen samian krama Bali majanten setata Ing Ngarso Sung Tulodo pamekas prasida ngicen tetuladan majeng anak tiosan. Sapunapi taler mangda prasida wenten ring tengah Ing Madyo Mbangun Karso, saha prasida dados angga sane prasida nangiang wiadin nguripang semangat samian angga, silih tunggilnyane nguningin indik pikobet sane wenten mawinan prasida karuruhang pamargi majeng pikobet sane kaarepin krama. Saha salanturnyane Tut Wuri Handayani sapunapi titiang mangda prasida ngicen dorongan moral wiadin semangat kerja saking ungkur majeng samian krama pamekas pelaku UMKM se-Bali," Baos Ny. Putri Koster.
"Antuk nyarengang para cendekiawan saking Perguruan Tinggi sajeroning ngruruh prospek kemajuan sane wenten , majanten pangupaya sajeroning utsaha nglimbakang produk puniki jagi prasida mamargi antar labda karya," Baos Ny. Putri Koster.
Bupati Jembrana I Nengah Tamba sane rauh kasarengin Ketua Tim Penggerak PKK Kabupaten Jembrana Gusti Ayu Ketut Candrawati Tamba ring galahe punika nlatarang yening Perancak sane magenah ring pasisi segara dahat potensial ngasilang ulam sane becik, mawinan krama irika akehan pinaka bendega saha para istrine madue kawagedan ngolah ulam segara. Ring galahe mangkin sampun prasida ngolah saha produksi bedetan 300 kg utawi tiga kuintal satunggil rahina. Parindikan puniki majanten ngicen pawesana becik majeng Kabupaten Jembrana sajeroning nglimbakang widang UMKM.
"Yadiastun Jembrana antuk 122 sentra tenun durung prasida manados pusat pariwisata, nanging melarapan antuk karesmiangnyane kawasan produksi produk sane mawit saking olahan ikan, kaaptiang prasida ngicen nilai tambah majeng panglimbak UMKM/ IKM sane wenten ring Jembrana," Baos Bupati Tamba.
Manggala prawartaka parikrama sane taler pinaka anggota Kerthi Bali Research Center UNHI, I Putu Fery Karyada maosang yening genahe puniki pinaka CSR saking BCA sane marupa tiga (3) wewangunan, minakadi wewangunan sane kaanggen genah pembersihan miwah pengolahan ikan, wewangunan Solar Dryer Dome sane kaanggen ngeringang ulame antuk suhu 70 Derajat Celcius, miwah wewangunan packaging.(Rls/Btnc)
Komentar