UNUD Kapilih Nyarengin Rancang Perpres indik IKN, Sekda Dewa Indra Ngaptiang Mangda Ngamedalang Pamikayun saha Pikaryan Pinih Becik
- 26 Januari 2024
- 23:01 WITA
- News
DENPASAR,Balitopnews.com – Sekretaris Daerah (Sekda) Dewa Made Indra ngajiang saha rumasa bangga saantukan Universitas Udayana (UNUD) kapilih dados silih tunggil Universitas sane kapercaya nyarengin ri kala Nyusun Peraturan Presiden (Perpres) indik Rancangan Hukum Pengaturan Wilayah, Kewenangan miwah Kearifan Lokal Pemerintah Daerah Khusus Ibu Kota Nusantara.
“Mawinan ngiring sareng-sareng selagang galahnyane ngicen daging pikayunan utawi sumbangsih pikiran pinih becik mangda rumusan sane kaasilang sajeroning FGD puniki sayuwakti mawiguna,” parindikan punika kabaosang ri kala mungkah FGD Rancangan Peraturan Presiden indik Pembagian Wilayah Pemerintahan Daerah Khusus Ibu Kota Negara, magenah ring Ruang Rapat Praja Sabha, Kantor Gubernur Bali, Denpasar rahina Sukra (26/1).
Napi malih manut birokrat saking Pemaron punika, IKN nenten marupa ibu kota kewanten, nanging taler kapidabdabin pinaka kota internasional, sustainable city, miwah konsep ibu kota masa depan, mawinan kabuatang pendekatan sane sayuwakti becik. Kawentenan nomenklatur-nomenklatur sane dumun majanten sampun nenten kalaksanayang malih. “Nanging Titiang percaya sareng tim UNUD, prasida ngasilang rumusan sane ngicen rasa bangga,” baosnyane sinambi maosang yening masukan saking samian angga dahat kabuatang sajeroning ngasilang rekomendasi sane sayuwakti becik.
Dane nganggkenin yening kagingsirangnyane ibukota majanten nenten pinaka parindikan sane dangan. Napi malih ring makudang panegara muatang galah sane dahat sue. Ngingsiran IKN ring Indonesia rumasuk gelis, mawinan kabuatang makudang pangupaya. “Wantah strong leader sane prasida nglaksanayang saha tim UNUD rumasuk sane kuat punika,” baosnyane.
Kepala Unit Kerja Hukum dan Kepatuhan Otorita Ibu Kota Negara IB Nyoman Wiswantanu maosang yening IKN jagi manados pusat pengembangan, kemajuan ekonomi miwah simbol identitas bangsa. Tiosan punika, IKN taler jagi dados kota majeng dunia, saantukan katarka jagi akeh investor dunia nglaksanayang investasi irika. “Mawina kabuatang pangremba marupa ide wiadin pikiran ring nomenklatur Perpres Pembagian Wilayah puniki, silih tunggilnyane rauh saking UNUD,” baosnyane.
Dane ngawewehin infrastruktur setata kalimbakang ring IKN kantos mangkin saha kaaptiang ring tanggal 17 Agustus warsane puniki prasida kalaksanayang upacara HUT Kemerdekaan RI. Pemerintah ngaptiang malarapan antuk pewangunan IKN ring Pulo Kalimantan, mawinan perekonomian nenten kaulengang ring Pulo Jawa kewanten, nanging taler prasida nglimbak ring wewidangan sisi kangin panegara Indonesia.
Apresiasi taler kabaosang olih Dekan Fakultas Hukum UNUD, Prof. Dr. Putu Gede Arya Sumerta Yasa, SH., M.Hum. Parindikan puniki pinaka silih tunggil sumbangsih Bali pamekas UNUD majeng Indonesia, mawinan dane taler ngaptiang sokongan saking samian angga sajeroning pidabdab penyusunan nomenklatur Perpres indik Pembagian Wilayah di IKN.
Parikrama taler karauhin narawakya tiosan sajeroning FGD minakadi Prof. Dr. Ida Bagus Wyasa Putra, S.H., M.Hum miwah Prof. Dr. I Wayan Ardika, M.A, antuk moderatos Dr. I.B. Erwin Ranawijaya. (Rls/Btnc)
Komentar