Sékda Déwa Indra Ngwakilin Pj. Gubernur Bali Mungkah Bulan Bahasa Bali VI Warsa 2024
- 01 Februari 2024
- 16:02 WITA
- News
DÉNPASAR, Balitopnews.com - Sekretaris Daérah (Sékda) Provinsi Bali Déwa Madé Indra ngwakilin Pj. Gubernur Bali SM Mahéndra Jaya mungkah Bulan Bahasa Bali VI warsa 2024 ring Gedung Ksirarnawa, Taman Budaya, Dénpasar, Wraspati Pon Wariga, 1 Fébruari 2024.
Sékda Déwa Indra sané ngwacén pakéling Pj. Gubernur Bali negesang, Bulan Bahasa Bali pinaka sinalih tunggil ‘komitmen’ Pemprov Bali nglestariang basa, sastra, lan aksara Bali. “Pemprov Bali lan krama Bali maduwé pikayun sané pateh nglestariang basa, sastra, lan aksara Bali. Dumogi basa Bali ngancan ajeg tur dados sarana mababosan utawi ‘komunikasi’ ring keluarga, désa, lan genah tiosan,” baos Sékda Déwa Indra.
Déwa Indra ngaptiang parikrama Bulan Bahasa Bali kalaksanayang ring désa adat, désa dinas, lan lembaga pendidikan saking PAUD kantos perguruan tinggi. “Dumogo basa Bali sayan-saya nelusup tur kawigunayang antuk krama Baliné,” teges Déwa Indra. Napi malih ring panglimbak aab jagaté, akéh basa daerah sampun rered tur punah. Pinaka conto, ring Indonésia wénten 718 basa daérah, solas sané sampun tan wénten penuturnyané. Indiké puniki sampun kategasang antuk UNESCO duk warsa 2018 sané maosang sampun akéh basa Ibu sampun punah. Nika waninan lembaga PBB puniki netepang tanggal 21 Fébruari pinaka ‘Hari Bahasa Ibu Internasional’ lan pamargi Bulan Bahasa Bali ring bulan Fébruari mapaiketan ring pakéling ‘Hari Bahasa Ibu Internasional’.
“Sampun sapatutnyané iraga sané nuwénang basa Bali terus migunayang basa Bali nyabaran dina. yéning krama Bali sami migunayang, bilih-bilih maduwé manah nglestariang, titiang percaya basa Bali pacang lestari. Ngiring lestariang basa, sastra, lan aksara Bali,” pinunas Déwa Indra.
Kepala Dinas Kebudayaan Provinsi Bali I Gedé Arya Sugiartha maosang, Bulan Bahasa Bali VI warsa 2024 ngunggahang patitis ‘Jana Kerthi: Dharma Sadhu Nuraga’ sané mateges Bulan Bahasa Bali pinaka stana nyiwiang basa, aksara, lan sastra Bali, tur tresna asih sané ngukuhang jana kerthi krama Bali.
Bulan Bahasa Bali VI kalaksanayang selami a bulan, ngawit tanggal 1 Fébruari - 2 Maret 2024. Makudang-kudang acara pacang kamargiang sakadi: Féstival Nyurat Lontar lan Ngetik Keyboard Bahasa Bali pamiletnyané siswa SMA/SMK lan Perguruan Tinggi sajebag Bali, widyatula/seminar, wimbakara/lomba akéhnyané 20 wimbakara kasarangin antuk krama Bali lan perwakilan kabupatén/kota. Wénten taler kriyaloka/workshop, reka aksara/paméran pamiletnyané sekaa utawi komunitas lan UMKM sané magabung ring sekaa basa, aksara, lan sastra Bali. Sasolahan marupa aprésiasi sastra Bali, Konsérvasi Lontar. Pinaka panguntat, penganugerahan Bali Kérthi Nugraha Mahottama pinaka penghargaan utama katur ring tokoh sané nglestariang basa, aksara, lan sastra Bali. (Rls/Btnc)
Komentar