Nyaga Kawéntenan Pangan, Sékda Déwa Indra Ngaptiang Kabupatén/Kota Maduwé Perumda Pangan
- 15 Maret 2024
- 17:03 WITA
- News
BADUNG, Balitopnews.com - Sekretaris Daérah Provinsi Bali Déwa Madé Indra nunasang majeng kabupatén sané durung maduwé Perumda Pangan mangda gelis ngwentuk Perummda Pangan. Tatujoné mangda saling tulungin kawéntenan pangan ring kabupatén/kota. “Titiang nunasang makasami kabupatén/kota ring Provinsi Bali maduwé Perumda Pangan. Yéning sinalih tunggil kabupatén/kota kirang beras, mrasidayang nukar utawi numbas ring kabupatén/kota lianan sané kantun maduwé beras. Tatujonné nénten kantos kirangan stok pangan tur ngawinang pangargan barangé ngamenékang. Indiké puniki mabuat pisan mangda inflasi stabil,” baos Sékda Déwa Indra ring Rapat Koordinasi Wilayah TPID Bali Nusra di Hotél Laguna Nusa Dua, Sukra Umanis Langkir (15 Maret 2024).
Lianan punika, kawéntenan Perumda Pangan tatujoné ngambil pikolih pertanian saking kramané. Lianan stok pangan aman, plinceran perékomian kramané taler becik. Ring Rapat Koordinasi Wilayah Bali Nusra sané ngambil téma "Penguatan Kelembagaan Pangan di Daerah (BUMD/Koperasi) untuk Pengendalian Inflasi dan Mendorong Kerjasama Antar Daerah (KAD) di Wilayah Bali Nusra”. Sareng-sareng masemaya antuk nyaga pangargan pangan, nyitengang lembaga-lembaga pangan ékonomi lokal, lan nyokong mitra kanti anggén nincapang karahajengan kramané. Stabilitas harga pangan mabuat pisan apang kramané rahayu ring aab ékonomi sakadi mangkin.
Déwa Indra nguningang, ring Fébruari tahun 2024, inflasi ring Bali 2,98% (yoy), inflasi Bali pinih ageng 0,61% (mtm). Antuk inflasi yoy, angka puniki kantun ring range target inflasi 2,5±1%. “Inflasi prasida kaandegang antuk sinergi stakeholder malarapan Tim Pengendalian Inflasi Daerah (TPID) sané kadukung olih Gerakan Nasional Pengendalian Inflasi Pangan (GNPIP) malarapan ngmargiang strategi 4K luiré keterjangkauan harga, ketersediaan pasokan, kelancaran distribusi, lan komunikasi yang éféktif,” baos Déwa Indra.
Rakorwil pinaka sarana mligbagang pengalaman, sareng-sareng nyusun stratégi, lan ngukuhang kriya kanti anggén nyandegang inflasi lan ngembanganang kelembagaan séktor pangan. Dahat mabuat ngrombo nyandegang inflasi, nénten ja ring weidangan kabupatén/kota sajebag Bali, nanging kantos Bali Nusra.
Sinalih tunggil utsaha nincapang kerja sama antar daérah (KAD) anggén ngirangang disparitas pasokan lan harga antarwilayah. TPID patut nyelehin wewidangan surplus lan défisit tur dados duta nyokong kriya kanti anggén nyaga kelancaran distribusi. Kabaosang, kolaborasi pinaka kunci suksés nyaga stabilitas harga pangan. Malarapan pertukaran informasi, pengalaman, lan sumber daya, prasida nincapang sinergi ngarepang aab jagaté.
“Titiang ngaptiang, pamargin KAD nénten wantah malarapan skema government to government (G2G) nanging ngembangang dados business to business (B2B), Perumda Pangan lan Koperasi pinaka mitra strategis nyalurang komoditas pangan pada daérah surplus lan ngamolihang komoditas pangan pada daérah défisit,” baos Déwa Indra.
Makasami Perumda Pangan sajebag Bali sampun ngwentuk Paiketan Perumda Pangan tatujoné sinarengan nyokong perékonomian lan pengendalian harga pangan ring Provinsi Bali. Pinaka sinalih tunggil program penguatan kelembagaan Perumda Pangan sané kaaptiang dados muncuk tumbak ring utsaha-utsaha pengendalian inflasi ring Provinsi Bali.
Ahli Utama Itjén Kementerian Dalam Negeri Republik Indonésia, Rolekson Simatupang maosang, wénten nenem (6) utsaha Pemda ring penanganan inflasi daérah, luiré nglaksanayang operasi pasar murah, nglaksanayang sidak ka pasar lan distributor apang nénten nugdugang utawi nyimpen barang, kerja sama sareng daérah penghasil komoditi anggén nglancarang pasokan, gerakan menanam, merealisasikan Belanja Tidak Terduga (BTT), lan nyokong transportasi saking APBD. (Rls/Btnc)
Komentar